Sov’nances

Po vikè èchone

Marèdrèt, on viladje
d'omes di mèstî
 

1. Portraît

D'èwou ç' qui nos v'nans ?

Marèdrèt, on viladje qui s’ nom vint di Merendrech ; ça vout dîre "passadje di frèchaud" (wé). Il a crèchu à faît, dins on fond do l’ valéye do l’ Molignéye (one rivêre qui s’ va foute è Moûse).

Nin lon èri d’ tos cès cwins là, faîts po l’s-ârtisses : l’abîye dès bènèdictines di Marèdrèt (Atèlier po fè dès lètrines di coleûr, mètu su pîds è 1893) ; l’abîye dès bènèdictins d’ Marèdsous (Scole di Mèstîs d’ârt, mètûwe su pîds è 1903). Dispû aviè 1960, li viladje a r’cî dès-ârtisans conus d’ laudje èt d’ long : Antonio Lampecco (maîsse-potî), Félix Roulin (sculteû su mètaus) èt Bernard Tirtiaux (maîsse-vèrî, ome di tèyâte, scrîjeû èt sculteû).

C’èst surtout grâce à Jacqueline èt Djan Vereycken-Adam qu’on-z-a c’minci à fè d’ Marèdrèt, on viladje qui rachone lès-ârtisans ; one saqwè qu’ tot l’ monde coneut bin asteûre. C’èst zèls qu’ont faît r’fè l’ancyin.ne ûsine di pâte di frûts, cide èt jèléyes (Li Pomerèye). C’èst vêlà qu’il ont mètu leû galerîye d’ârt A la fontaine (1961) èt leû muséye do bwès èt d’ nosse vicadje di tos lès djoûs [musée du Bois et de la Vie rurale (1967)].

Lès-ârtisans qui travayenut à Marèdrèt, èt co quétefîye î d’mèrè, vol’nut à tote fwace fè one saqwè d’ bia, po vos l’ fè paurtadji èt vos l’ mostrè.


Èwou ç’ qui n’s-alans ?

Dispûs todi, lès djins d’ Marèdrèt ont seû aurdè l’ fameûs patrimwin.ne qu’on l’zî aveut d’nè. C’èst po ça qu’i sowaîtenut ècoradji lès-ârtisans qu’ont v’nu d’mèrè dins leû viladje. C’èst po ça èto qu’i r’cîyenut todi tos lès novias-ârtisans qu’ont lès min.mès-idéyes.

Tot mostrant l’impôrtance dès mèstîs d’ârtisans dins l’ vikérîye d’on viladje, tot Marèdrèt s’a bien promètu qui l’ 21è siéke causerè co d’ li.

Prinde one vôye què lès va minrnè pus lon ! Lès djins d’ Marèdrèt vol’nut rachonè dins l’ min.me pani : lès mèstîs qui fèyenut vikè, li plaîji d’ fè ça èchone, dins on payisadje qu’on ’nn’a sogne. Trwès-idéyes qu’on n’ saureut r’ssatchi one di l’ôte sins machurè l’ bèle imaudje d’on viladje come i gn-a pont.

Binaujes èt fiérs, lès djins d’ Marèdrèt, do p’lu r’cîre tos lès cis qu’acourenut veûy leû bia payis. Mins seûlemint à one condicion : qu’on rèspèctéye leû viladje qu’èst si bia, qu’èst si ritche èt qu’on-z-î èst si bin.
 

2. Noste idéye

Nos vôrins télemint bin :

• fè conèche Marèdrèt come li viladje di l’ârtisan :

- pa on calendriyer di tot ç’ qui s’ passe dins nosse viladje

- pa tot ç’ qu’anonce lès novèles, o djoû d’odjoûrdu : causadjes, gazètes, radio,   tèlèvisions, intèrnèt,...-

- pa tos lès djins d’ Marèdrèt èt tos sès-ârtisans

po qu’on-z-eûche l’idéye di v’nu veûy tot ça.

• mostrè Marèdrèt come li viladje di l’ârtisan :

- pa sès bias batimints èt l’ nature qui n’s-avans tot-autoû

- pa s’t-îstwêre

- pa sès djins èt sès-ârtisans qu’on rèscontère

po fè conèche nosse viladje.

• donè one bone idéye di Marèdrèt, viladje di l’ârtisan :

- pa sès reuwes bin prôpes

- pa sès djins amich’tauves

- pa sès-ârtisans

po yèsse vraîmint dins l’ vîye di nosse viladje.

• fè vikè Marèdrèt come viladje di l’ârtisan :

- pa totes lès novèlès-idéyes qui nos pôrins awè

- pa ç’ qui nos-apwaterans à tot ç’ qu’èst d’dja faît

- pa tos lès loyins qui n’s-aurans avou lès cis qui boutenut

po fè vikè nosse viladje, todi one miète pus fwârt.
 

3. Valeûrs

Si plaîre à Marèdrèt dins l’ vicadje di tos lès djoûs come à l’ocâsion d’ cès fièsses là qu’on faît po l’ culture oubin po lès mèstîs d’ârt, ça nos-ègadje à paurtadji tot ça avou l’s-ôtes :

Vikè èchone, c’èst :

• rachonè lès djins d’ Mârèdrèt èt lès-ârtisans tot roviant nos difèrinces

• choûtè l’s-ôtes, causè avou zèls èt l’zî d’nè l’ côp di spale qu’i ratindenut

• prinde plaîji à s’ trovè li min.me

Ricîre, c’èst :

• v’lu, à tote fwace, fè conèche Marèdrèt

• sawè douviè s’-t-uch aus-ôtes

• si rèscontrè po s’ mia conèche

Rèspèctè, c’èst :

• veûy voltî tot l’ monde, lès djins do viladje, lès-ârtisans, lès tourisses, en roviant nos difèrinces

• prinde sogne di nosse patrimwin.ne èt l’ garanti

• fè tot ç’ qu’i faut po s’ mia conèche

Sawè fè, c’èst :

• awè l’ dâre d’aprinde èt d’ sawè

• mostrè qu’on wèt voltî tot ç’ qu’èst bia

• fè passè l’ mèssadje èt l’èspéryince dès cis qui nos-ont mostrè l’ vôye

Ôrganisè, c’èst :

• v’lu fè one saqwè tortos èchone

• ni jamaîs riv’nu su ç’ qu’on-z-a promètu

• si mète tortos au courant n-on l’ôte

 

 

 

---

 

Marèdrèt, li viladje da Djan-Leup

 

 

Djan-Leup.

 

 

---

 

 

CAUSER L' WALON ?

RIN D' PUS AUJI !